الأحد، 27 مارس، 2011

هذا الشخص تقدم لي كثيـــــــــــــــــــــــــــــــــــــراً و آخر مرة تقدم لي فيها كانت اليوم وربما هذا هو سبب كتابتي لهذه التدوينة وإليكم القصة:

حينما كنت في الصف الثاني الإعدادي ، طرد أحد أقربائنا ابنه الشاب من المنزل فجاء به والدي ليسكن في مجلسنا حيث أن مجلس الرجال الخاص بنا منفصل عن المنزل ، ولم أر هذا القريب في حياتي من قبل ولا من بعد فأنا لليوم لا أعرف تفاصيل ملامحه ولو رأيته في الشارع لما عرفته ، فنحن محافظون ولا نسلم ولا نجلس مع غير محارمنا فلم يكن هناك مجال لنلتقي،....

وفي يوم من الأيام بعد مرور سنة وهذا "السوبر جلو" ما زال يسكن في بيتنا (طلع عيني وانا اطبخ واكوي وانظف وراه ترى ايامها مافي بشاكير منقوووود عند العرب وكنت أنا البشكارة الرسمية) المهم في ذلك اليوم ارتديت "مخورة" (اللي ما يعرفها من الشعوب الشقيقة يدور صورتها في الجوجل)، و مشطت غرتي "على جنب" (ينصر ابو الكشخة مارلين مونرووو زماني)، ولكني لم أتزين بدون سبب إذ أن كانت لدينا وليمه (وليمة عزييمة لا تدققون خخخخ فاته لو جافني في الأيام العادية ما حبني) ، يا عمي بلا فصحى بلا بامية خخخخ المهم كانت عندنا عزيمة وكنت سايرة اييب صحون حق الحريم من المطبخ ومطبخنا كان منفصل عن البيت الرئيسي وبينه وبين المجلس حاجز ولكنه في ذلك اليوم عبر الحاجز ليضع الصحون على عتبة باب الحاجز كي نغسلها، وهنا لعب القدر لعبته خخخخخخخخ ولمحت أحدا عبر شعيرات قذلتي هههههه يقف متسمرا على جانبي من على بعد مترين ثلاثة وهالشخص ما يروم يجوف ويهي عدل لأن القذلة على نص ويهي (أمحق تسريييييحة مصدقة عمري جورجي) وشيلة الصلاة مغطية الباقي وما يجوف الا طرف مخورتي ، وجان اصيح ويييييلات وأشخط وما يجوف إلا غباري ، وثاري الريال عيونه قلووووب ♥_♥ وقلبه طربنق طربنق وأنا يا غافلين لكم الله وطلع هذا ابن قريبنا المطرووود ،...

وجان ما العن وأسب بوووو خامسه جدام اخواني حليلي عندي حمية وغيرة على نفسي خخخخخ ، المهم الريال ضبط اموووره سريع سريع مع ناس ساعدوه عسب يفتح محل وطلع من بيتنا ويا وخطبني وأيامها بعدني في المدرسة فأبوي رفض ولله الحمد، وتم يخطب وابوي يرفض ، خخخخ انصح اللي يبن يعرسن بالمخاوير والقذلة على صوب، وأنا مستغربة واقول لعمري عافانا الله صدق مب جايف خيييير الحين يبا يتقدم لوحده بناءً على طرف مخورتها وطرف قذلتها لا وحب افلاطووني بعد، لكن لين الحين والريال عدااااه العيب وما غلط يعني مراهق وايامها الحريم عندنا عباة على الراس والويوه مغطاه ولا اختلاط ولا بطيخ حتى التلفزيون ما يعرض غير ارضنا الطيبة وارضنا الخضراء وتوم وجيري وخالتي قماشه وخرج ولم يعد ، يعني الواحد مثل الكتكوت اللي يطلع من البيضة اي حد يجووووفه يقله ماما نفس توم وجيري، واالشباب جي بعد اول وحدة يجوفها يعتقد انه يحبها حليلهم كانوا ابرياء ،
...

المهم أنا دخلت الجامعة والريال فقد الأمل لأن أبوي قال نووو وييي قبل ما اخلص جامعة ، فصار ان اللي ساعدوه يفتح محل واللي صار ساكن عندهم لاحقا عرضوا عليه يزوجونه بنتهم، فوافق وتزوجها، المهم سمعنا ان الريال مرتاح ويا هز نيو وايف، وصار مع الوقت تاجر ودخله ممتاز واحسن من دخل الجامعيين انكلووودنق ميييي وأنا تخرجت ومن تخرجت وهو يخطبني وأنا أرده لأني أصلا ما كنت اريد اعرس وحتى لو فكرت اعرس مستحيل اخذ واحد متزوج يععععع الله لا يحطني في هالموقف يا رب آميييييييييييييين،.... وصدقا كرهته يوم خطبني وهو معرس وعنده ذرية وحرمته واهلها ما قصروا وياه... لكني بعدني ما احتقرته ولكن....

قبل كم من شهر جبر زوجته اتييني وتخطبني حقه!!! طبعا قلتلها تقوله نجوم السما اقربله وخل يجابلها ويجابل عياله، اسميها فرحت واسميه نذل حيوان كيف جي يذلها لهالدرجة!!! هنييي صدق طااااااااااح من عيني واحتقرته ،

ومن شهر حصلت بينه وبين زوجته مشاكل وفرها بيت أهلها ورمى عليها اليمين وقال انها مب راعية سنع وغيره من التهم جدام أهلها، ثاريه مسوي ها كله عذر عشان ايي يخطبني واليوم أمي كلمتني وقلتلها والللللللللللللللله العظيم لو يكون أخر ريال في العالم ما خذته ، مسكينة حرمته غربلها عسب شو يا حسرة طرف قذلة وطرف مخورة ما قدر ينساهم!!! وعايش معاهم افكار رومانسية، اسمه لو درى عن خبالي وافكار الجنونية والعبط اللي انا فيه ما فكر لحظة فيني، ولو كان جافني في يوم كنت فيه بكشتي الطبيعية وبجامتي الغريبة وأنا العب كورة مع اخواني الشباب كل يوم العصر في الحوي ما جان فكر فيني لحظة، للأسف فكرني زينب العسكري ومناك كنت عبسي ايامها هههههه، وضحية مراهقته اللي مب قادر يتجاوزها هي حرمته اللي صبرت عليه هي وأهلها لين ما استوى ريال، صدق أنه نذل و سطحي وماله أمان ...
مب قادرة افهم الريايل !!!

هناك 7 تعليقات:

Heart Moon يقول...

يعني نخلط عامي وفصحى وانجليزي ^__^
مقالة صيغت بطريقة رائعة استمتعت وتالمت وانا اقرا حروفها تعرفت على رحيل اكثر عن السابق واكتشفت اشياء عن شخصية رحيل احتفظ بها لنفسي ^__^
رحيل المرأة هي من تنشيء الرجل لهذا ان كان هناك قصور فمن المرأة ولكن في مجتمعنا الذي قلبت فيه العادات والتقاليد رأس الحقيقة صار العكس صارت المرأة مهمشة ومجرد اداة فمحبة امراة من لبسها او المخور او قصتها (ذكرتيني بالثمانينات واول التسعينات) دليل على التركيز الجنسي اكثر من المضمون ..
وو ما عندي اكثر عن جي اذا انتي تقولين ما قدرت افهم الرجل يعني نحن شو نقول ^__^ المرأة اصعب ..
وبخصوص الزوجة الثانية يعني الشخص مب قادر يداري ويعطي حقوق الاولى كيف يطلب الثانية وخاصة في وقتنا صعب الواحد يقدر ينشأ عائلتين الحياة صارت معقدة والتربية صعبة والشخص ما يقدر يركز على احتياجات الزوجة الاولى والابناء كيف بقدر على احتياجات اكثر .. الله يهدي ويصلح جميع المسلمين والمسلمات .. آمين
ووو الله يعطيج العافية والى الامام ..

حــبــر ورقــــ ! يقول...

عزيزتي رحيل

خل يولي انا بعد طاح من عيني بدون ما اعرفه

واللي يسوي جيه مع ناس ساعدوه وخدموه عادي يسويها مع اي حد

انا اثق انج تستحقين رجل افضل من هذا بمئات المرات



= )

ضحكت وانا اقرى هالتدوينه يعطيج العافيه

ٌرحيـــــــــــــــــــــــل يقول...

هارت مون ، زين عيبتك الخلطة خخخخ تخاريفي قبل الرقاد وهم بعد ردي الحين يعتبر ضمن تخاريف ما قبل النوم، مبرووووك النك اليديد، شو اكتشفت عن شخصيتي؟؟؟؟ والله يستر يعني هالتدوينة ما اعتقد انها تعبر عن شي ايجابي فيني خخخخخخ ...
اما بالنسبة لفهم المرأة فالمرأة روحها مب فاهمة عمرها!! الله يعينكم قووود لكك وذ ذات...
أسميني لاعت جبدي من هالريال امثر بعد عبارتك هذه "فمحبة امراة من لبسها او المخور او قصتها (ذكرتيني بالثمانينات واول التسعينات) دليل على التركيز المعفن اكثر من المضمون" صدق صدق يتني قرشعيييرة مدري قشعريرة ... يعععععع منه !!!! الله يسامحك !!
اما المخورة فهاي كانت اللبسي الرسمي مالي جدام العرب لأنه ابوي كان مانعنا لين ال 2000 تقريبا نطلع جدام الضيوف وفي المناسبات الا بالمخاوير...

بالنسبة للجوزة الثانية ما عندي هالطموح وما برمس وايد عسب الله ما يبتليني مثل ربيعه عندي الله كانت تقول مستحيل وعقبها صار اللي صار والله يسهل عليها... بس أنا مب من أنصار هالشي وخلاص.

ووو الله يعافيك

ٌرحيـــــــــــــــــــــــل يقول...

حبــــــــر وورق:

انا مستانسة انج توافقيني الراي، وصدقج مافيه خير للناس اللي ساعدوه فما بيكون فيه خير في أي أحد، ...

عساج دوم ضاحكة والله لا يحرمنا من ضحكتج الحلوة ♥

سهـــل يقول...

هذا الريال المسكين اللي عيونه على شكل قلوب على احد ان يفرجه على توم وجيري والبرنامج التربوي الارض بتكلم عربي عله ينسى (:

هههههههه رحيل لو عرف بكي يوسف عوف لقاضاكي بتهمة سرقة القراء من اعماله

وكمان والدك بيرد على طلبه بالانجليزي .. يمكن الريال مش فاهم يعني والدك موافق ولا رافض



--------

ترجمي الى العربيه

بشكاره

عسب

يجابل

ٌرحيـــــــــــــــــــــــل يقول...

خخخخ سهل هالبوست عيار العامية فيه ثقيل جدا وما توقعتك تفهمه، اوكي اليك الترجمة:

بشكارة= خدامة
عسب= من أجل أن
يجابل= هنا بمعنى يراعي و يكون مع

ودُم دا دا دُم دادا دُم دُم دُمتم طيبين

εïз◦جواهر بنت عبدالله◦εïз يقول...

سلام رحيل

عاااادي ..جدا عااادي ...

عقلية رجاااال<<<وحده حدها معصبه

شوفي الرجال وانا اقصد الاغلبية..حط موضوع براسه .. الا يسويه و ثمـ(ن) بعد ما يسويه ..يفكر هل هو صح او خطاء

اصبح امتحان تقابلينه ..انك تفقهمين الــ(مان)

ما تعبني بي هالدنيا الا (الفذر) وعقيلته

الله يصبرك .. بعد تعالي انت تقولين ما شفتيه
يمكن هو شافكم مني مناك ..

برب ..

باحوط بالمدونة