الأربعاء، 20 يوليو، 2011

رحيل انحرفت




تعرفون كيف هو حال الكثير من الفتيات اللواتــــي يعشن ضغوط نفسية ويعانين من قلة الحب والاهتمام بهن، وكيف ينتهي المطاف بهن بالانحراف او الانجراف وراء أمور خاطئة...

اليوم أنا انحرفت ... بصراحة الموضوع ما يتحمل اي فصحاوية، تعرفون عسب أعبر عدل عن آهاتــــي وحرقتي على نفسي اللي بدت تنحرف وتضيع :( وأنا للأسف قاعده أطاوعها!

من يومين كنت في ملجة (عقد قران) حد من الأهل واليوم اللي بعده كنت في حفلة، وكنت مريضة وعيوني منتفخة وتدمع وخشمي يمطر، اللهم لك الحمد والشكر ، بس غصب عني رحت ولا الوالد بيقضي على حياتي...

أحلى شي يوم العروس بتدخل، فأنا ركضت وقعدت في كرسي من اللي جدام حذال الكوشة، و لقيت عمري بجوار احد اهل المعرس اللي ما اعرف ولا حد فيهم، و كنت ادمع لأن عيوني مريضة وأشوفط هالمخاطين، سألتني: "انتي معرسة؟"، قلتلها وأنا اتابع أشفط السيول اللي بدت تتدفق من خشمي للداخل وأنا معصبة وأقول في نفسي: "ناقصينها هاي شكلها تبا تخطبني"، وأجبت بالنفي، فحط ايدها على جتفي، وأنا لايعة جبدي منها وأقول: "آآآآآآآآآآخ من الحين تبا تلعب دور الحماة الطيبة ما يخصني ماباااااااااا يعني ماباااااا"، جان تقولي:"ما عليـــــــــه يا بنتي الزواج نصيب ورزق وانتي ادعي والله بيرزقج"، فبطلت حلجي على مصراعيه مندهشة ، وتابعت الشيخة: "لا تصيحين خلاص اصبري ، الصبر مفتاح الفرج"،...

عاد أنا محد يسويلي سالفة ما أصدق خبرأحب أعطي كل انسان على دقته، تميت اتبجبج وأقول لها: "بس أنا صكيت ال 37 ومحد دق الباب ، شسوي خاطري في عيال، خاطري في ريل ، اهئ اهئ "، حليلها تعاطفت وياي وقالت لي: "بس ماشالله ما يبين عليج ، شكلج صغيرة، بس اسمعي لا تقولين لحد عمرج واذا يوج خطاب لا تخبرونهم عمرج الصجي لين الملجة، صغري عمرج بيصدقونج"، فقلت لها وأنا أشفط مخاطيني وأنا اطمع في كلام حلو :"ان شاء الله، يعني كم يبين علي؟؟ شو من عمر أعطيهم عسب يصدقوني؟؟"، ودشت العروس وصرقت مني الأضواء، تف عليها!

نتابع قصة انحرافي، المهم كل ما حطوا أغنية قامن هالعيايز والشابات والبنات المفاعيص اللي توهن طالعات من البيضة وهات يا هز،تف عليهم كل ما حطوا شي رقصن! رقص احترافي وصح الصح بعد... ونفس الشي في الحفلة اللي كانت في اليوم اللي بعد الملجة، طبعا هاي مناسبات عائلية يعني اسير غصب عني، المهم هم يرقصون وأنا مثل كل مرة في كل مناسبة مبطلة حلجي على مصراعيه، يتني اللوز من كثر ما بطلته ...

اليوم اللي بعد الحفلة امي تمت تهزبني:" جوفي العيايز والبنات كيف يرقصن وانتي ما تعرفين ترقصين ، جوفي كيف يكشخن وانتي فرحانة بعباتج وشيلتج العاديات، وين تودين راتبج بس؟؟ لا ماركات ولا عبي نفس البشر، والفستان اذا شريتيه تلبسينه في عشر مناسبات" ، طبعا انا فاهمة ان امي تباني اتنحنح عسب الله يكرمها بواحد يخلصها مني... حليلها أمي سطحية وتحب المظاهر ، كل الناس يقولون ان امي اكشخ عني بواااااايد، وفي الأعراس ما تيلس كله ترقص... وأنا أتفرج عاللي يرقصن وابتسم جني ابو الشباااااب ، الحاج متولي خخخخخ بس من داخلي اقول: "يعععععع كيف يحركون هالأماكن من جسمهم جي جدام الناس ، ما يستحون" ، أحس عيب!!

المهم الليلة بعدما مشيت ساعه كالعادة وأنا اسمع البي بي سي في راديو تلفوني، خذت شاور طوووووويل ومريح ودخلت غرفتي وجربت البودي الوردي اليديد اللي شريته من شهر وما لبسته حتى الآن لأن وزني كان زايد، ولما لبسته حسيت بالرضا ودخل في نفسي شيء من الاعجاب بالذات، عاد لا يسير عقلكم بعيد لأن البودي وردي ترى مرسوم عليه عين كبيييرة وعين صغيرة وفم واحد مطلع لسانه... فجأة لقيتيني اتسشور وأسوي تسريحة ، وأحط هالجحال الفرعوني والروج الأحمر!! ويلست اتصور نفس المراهقات! ما سويتها في مراهقتي ياية اسويها وانا على اعتاب ال 29 !

مليت من التصوير وتميت اطالع فالمراية ، وسرحت في المليارين اللي بتزيدهم السعودية على التسليح و فكرت ان هالشي اكيد بسبب اللي صار في البحرين وكيف ان اللي صار في البحرين ظاهره نقمة وباطنه نعمه لأنه حذرنا من خطر الشيعة و كان سبب في ظهور درع الجزيرة، فجأة انتبهت وقلت لعمري:" اييييي انتي، في بنت حلوة جي وتفكر في درع الجزيرة؟؟" ، بعدها غمزت لنفسي وعضيت على شفتي وقلتي لنفسي: "صوووبنا يا حلو ;)" ، ...

وعشان اغير موضوع درع الجزيرة، قمت أدور على أغنية مصرية بدون موسيقى، وحصلتها، فسكرت الباب بالمفتاح، وربطت الشيلة على وسطي، وتمركزت جدام مرايتي الفقيرة اللي عمرها ما جافت هالمناظر، زين ما انكسرت من هول الصدمة، ...

تعرفون يوم البنات المصريات مال 4 سنين يرقصن شرقي كيف يكون شكلهم؟؟ كيوت صح؟ أنا نفس الشي، والله كنت بحضن عمري في المراية فديتني كيوت أهبل ^^...

أي بمعنى آخر فاشلة في الهز يا وز، رقصي كان هابط في مستويات السرعة والمرونة والأداء وكل شي، تقولون حطبة تحاول ترقص، عاد احلى شي يوم تخيلت لو اني معرسة وبرقص لريلي مثلا، اسميني انخشيت ورا الشماعة من المستحى، مصدقة عمري نصفي الثاني اللي بعدها امه ما يابته يالس ، كيف هالممثلات يرقصون جدام اللي يسوى واللي ما يسوى؟؟ كيف المعرسات يرقصن لرياييلهم؟ صج تف عليهم كلهم ما يستحون على ويوهم!

حليله والله ريلي اللي ما باخذه واللي لو خذته 100 في المية بيطلقني ، ما أحب الكشخة المستمرة ولا أعرف أرقص، فليش بيستمر وياي مثلاً؟؟ كلهم اللي يعرسون الحين يدورون وحدة جي محد يستمر مع شاكلتي من الحطب اللي حتى يوم بغت تنحرف تمت تفكر في درع الجزيرة....

وانتهت قصة انحراف رحيل بالفشل الذريع وأثبتت أنها هووووبليــــــــــــــــــــــــــــــــــــــــــس بجدارة.




هناك 8 تعليقات:

εïз◦جواهر بنت عبدالله◦εïз يقول...

السلام عليكم ورحمة الله وبركاته

يا شيخه فديت الانحراف اللي كذا
اختلف عنك انه لو تنطبق السماء على الارض ما حد غصبني على الروحه لماكن ما احبه

ترا اخبرك مو بس انت اللي تقولين وععع ليه يهزون الاماكن ذي

والرسوب مستمر في هز يا وز


اختك

3alamee يقول...

هههه
عجبني أسلوبج وآيد فديتج..
و بعدين ترآ كل خيرة و فيهـآ تأخيره

الله يوفقج و يرزقج ع قد نيتج..
أمـآ الهز و الكشخة المستمرة ترآ وآيدآت جي << و إختج منهم_*

تقبلي مروري الأول لمدونتج..
كل التحية..~

ٌرحيـــــــــــــــــــــــل يقول...

جواهر:

يا حظج، نحن اذا في مناسبة لأحد من الأهل لو تنقلب السما عالأرض تسيرين يعني تسيرين،
و يا مرحبا بج رفيقة كفاح في درب الأنوثة المتعثرة حسب مقاييس هالزمن :)

ٌرحيـــــــــــــــــــــــل يقول...

3alamee

يا هلا فيج ، ومرور أول ممييز :)

سهـــل يقول...

مدونتك تستحق ان تكون مشهورة وشعبية (:

ٌرحيـــــــــــــــــــــــل يقول...

سهل:

مشكور عالمجاملة اللي ما اعرف سببها :)

أخـت فـى الله يقول...

اسم الله عليكِ يا رحيييل ههههههه
كويس انها جت على اد كدة

ٌرحيـــــــــــــــــــــــل يقول...

هلا بالعروس :)

منورة ♥

الحمدلله يت سليمة ☺