الخميس، 1 أكتوبر، 2015

رسالة إلى ميم

 
ميـــم حبيبتي اشتقتلج 

تذكرين يوم كنا نسهر على التلفون ونحن نشوف مع بعض أفلام رسوم :) مع أن الرسوم ما تعيبج و تبين تشوفين فيلم أكشن بس تشوفينهم عشاني ...

تذكرين لما نشفر و نحن نتكلم عن الليتات الحمرا هههه، كنا لم نتكلم عن اللي يصير في العالم في التلفون نشفر مع أن سوالفنا عادية بس نخاف، و نتخيل اننا لما نتكلم في هالامور في ليت أحمر يشتغل عند الاتصالات و بيمسكوننا، عاد اللي يخوفنا كان لأنها قالت لي أنها سمعت أن اللي يمسكونه يفصخونه و يفتشونه وهو في وضعية الركوع قبل لا يسألونه أي سؤال ، نحن أي شي عادي عندنا الا انهم يفصخونا هههه ...

تذكرين ميم لما خبرتيني قصص تخوف عن الناس لأنج منقهرة من أني كنت عبيطة ههههه و انا كنت أتأثر و أصيح وما أنام 

تذكرين لما ماتت هدية حيواني الأليف اللي ربيتها 3 سنين، ودقيت لج و أنا ميتة من الصياح وتميتي تواسيني و آخر شي انفجرتي من الضحك علي :)

تذكريني لما كنتي تقنعيني انج تشوفين الجن والشياطين و تخوفيني ان فيني يني و انا ازييييغ هههه 

تذكرين الدفتر اللي تكتبين فيه الامور اللي تقهرج فيني و تذكرين لما حرقتيه :)

تذكرين عشرة العمر و الأيام والشهور والسبع السنين اللي كنا فيها مع بعض يوميا نتكلم و نتكلم و مانمل أبد و ما تخلص سوالفنا :) 

ميم شكرا وايد ساعدتيني و رفعتي معنوياتي و قويتيني و علمتيني، شكرا لانج كنتي جزء جميل من حياتي، جزء انتهى و لكن تبقى الذكريات اللي مستحيل تنتهي الا اذا اصابني الزهايمر... لكني اخترت اني ابتسم لما اتذكرج و ما ابكي، أني أدعيلج ...

أحبج وايد.



ليست هناك تعليقات: